Vandag is weer ‘n spesiale Vrydag. Die eerste dag van ‘n splinternuwe kalenderjaar! Alhoewel dit vir die natuur rondom ons net nóg ‘n dag is, dra dit vir ons as mense spesiale betekenis.

Dit gee ons ‘n geleentheid om dinge agter te laat en weer te begin.

My Nuwejaarswens vir elkeen in ons gemeente vind ek in hierdie woorde van Cyprianus, biskop van Karthage, wat in die derde eeu aan sy vriend Donatus geskryf het:

“Dit is ‘n slegte wêreld, Donatus, ‘n ongelooflike slegte wêreld. Maar ek het te midde daarvan stil en heilige mense ontdek wat ‘n groot geheim geleer het. Hulle het ‘n vreugde gevind wat duisend keer beter is as enige van die plesier van ‘n sondige lewe. Hulle word verag en vervolg, maar hulle gee nie om nie. Hulle is meesters van hul siel. Hulle het die wêreld oorwin. Hierdie mense, Donatus, is Christene…. en ek is een van hulle. ”

Ek is ook een van hulle. Ons saam is van hulle wat hierdie groot geheim ontdek het. Mag ons dit nié in 2021 geheim hou nie.

“Die geheim is dit: Christus is vir almal ook vir julle. Op Hom kan julle met vertroue staatmaak. Hy sal vir julle die wonderlike dinge gee wat ’n mens net by God kan kry.” Kolossense‬ ‭1:27‬ ‭DB‬‬

Geseënde en voorspoedige jaar. Ons sien uit daarna om saam met elkeen in hierdie gemeente en gemeenskap te stap!